زمیں نژاد ہیں لیکن زماں میں رہتے ہیں
مکاں نصیب نہیں لا مکاں میں رہتے ہیں
عبد العزیز خالد
……………
نصیب اس کے شراب بہشت ہووے مدام
ہوا ہے جو کوئی موجد شراب خانے کا
عبدالرحمان احسان دہلوی
…………..
میں بد نصیب ہوں مجھ کو نہ دے خوشی اتنی
کہ میں خوشی کو بھی لے کر خراب کر دوں گا
عبد الحمید عدم
………….
ہوا ہے جو سدا اس کو نصیبوں کا لکھا سمجھا
عدیمؔ اپنے کیے پر مجھ کو پچھتانا نہیں آتا
عدیم ہاشمی
……………
ان سے مرے نصیب کا چکر بنا دیا
کچھ گردشیں جو بچ رہیں لیل و نہار سے
افقر موہانی
…………
ایسی ہیں قربتیں کہ مجھی میں بسا ہے وہ
ایسے ہیں فاصلے کہ نہیں رابطہ نصیب
افضل علی افضل
……..
میں نے سوال وصل جو ان سے کیا کبھی
بولے نصیب میں ہے تو ہو جائے گا کبھی
آگاہ دہلوی
………..
تم اور فریب کھاؤ بیان رقیب سے
تم سے تو کم گلہ ہے زیادہ نصیب سے
آغا حشر کاشمیری
…………
اس زندگی میں اتنی فراغت کسے نصیب
اتنا نہ یاد آ کہ تجھے بھول جائیں ہم
احمد فراز
…………
ہجوم ایسا کہ راہیں نظر نہیں آتیں
نصیب ایسا کہ اب تک تو قافلہ نہ ہوا
احمد فراز
……….
تمہاری خوش نصیبی ہے کہ تم سمجھے نہیں اب تک
اکیلے پن میں اور تنہائی میں جو فرق ہوتا ہے
عائشہ ایوب
………..
خوش نصیب آج بھلا کون ہے گوہر کے سوا
سب کچھ اللہ نے دے رکھا ہے شوہر کے سوا
اکبر الہ آبادی
………
کسی کے تم ہو کسی کا خدا ہے دنیا میں
مرے نصیب میں تم بھی نہیں خدا بھی نہیں
اختر سعید خان
………..
یہ پوچھ آ کے کون نصیبوں جیا ہے دل
مت دیکھ یہ کہ کون ستارہ ہے بخت میں
اکرم نقاش
………..
شوریدگی کو ہیں سبھی آسودگی نصیب
وہ شہر میں ہے کیا جو بیابان میں نہیں
عالم تاب تشنہ
………….
مدت میں شام وصل ہوئی ہے مجھے نصیب
دو چار سال تک تو الٰہی سحر نہ ہو
امیر مینائی
………….
وہ ترے نصیب کی بارشیں کسی اور چھت پہ برس گئیں
دل بے خبر مری بات سن اسے بھول جا اسے بھول جا
امجد اسلام امجد
………..
ہم فنا نصیبوں کو اور کچھ نہیں آتا
خوں شراب کر لینا جسم جام کر لینا
انجم عرفانی
……….
نہ پوچھ اس کی دل افسردگی کی کیفیت
جو غم نصیب خوشی میں بھی مسکرا نہ سکا
انجم مانپوری
…………
ملنا تھا اتفاق بچھڑنا نصیب تھا
وہ اتنی دور ہو گیا جتنا قریب تھا
انجم رہبر
……………….
جناب کے رخ روشن کی دید ہو جاتی
تو ہم سیاہ نصیبوں کی عید ہو جاتی
انور شعور
……….
تو سر نہ گوندھ کہ شاگرد ہونے والا ہے
مرا نصیب ترے لمبے لمبے بالوں کا
عاشق اکبرآبادی
………….
تری شوخ آنکھوں میں بارہا کئی خواب دیکھے ہیں پیار کے
ترا پیار میرا نصیب ہے کسی اور کو یہ وفا نہ دے
عتیق انظر
…………..
کتنا ہے بد نصیب ظفرؔ دفن کے لیے
دو گز زمین بھی نہ ملی کوئے یار میں
بہادر شاہ ظفر
………….
سکوں نصیب ہوا ہو کبھی جو تیرے بغیر
خدا کرے کہ مجھے تو کبھی نصیب نہ ہو
بسمل سعیدی
………….
ہتھیلیوں میں لکیروں کا جال تھا کتنا
مرے نصیب میں میرا زوال تھا کتنا
اعجاز عبید
…………..
نہیں نصیب میں منزل تو راستے کیوں ہیں
طویل تر یہ جدائی کے سلسلے کیوں ہیں
فرح خان
…………..
ایک بوسے کے بھی نصیب نہ ہوں
ہونٹھ اتنے بھی اب غریب نہ ہوں
فرحت احساس
………….
میرے پہلو میں تم آؤ یہ کہاں میرے نصیب
یہ بھی کیا کم ہے تصور میں تو آ جاتے ہو
غلام بھیک نیرنگ
………….
ہے نوید بہار ہر لب پر
کم نصیبوں کو اعتبار نہیں
حبیب احمد صدیقی
…………..
عاشق سا بد نصیب کوئی دوسرا نہ ہو
معشوق خود بھی چاہے تو اس کا بھلا نہ ہو
حفیظ جالندھری
………….
یہ بد نصیبی نہیں ہے تو اور پھر کیا ہے
سفر اکیلے کیا ہم سفر کے ہوتے ہوئے
حسیب سوز
…………
ہمارے آنسو کسی ٹھکانے تو لگ رہے ہیں
فرات کے بد نصیب پانی کا کیا بنے گا
حسیب الحسن
…………
شاعری ہے سرمایا خوش نصیب لوگوں کا
بانس کی ہر اک ٹہنی بانسری نہیں ہوتی
ہستی مل ہستی
………….
جتنی فرصت ہے زندگی میں نصیب
اتنی فرصت میں میں سے تو ہو جا
افتخار حیدر
…………
ہزار آرزو ہو تم یقیں ہو تم گماں ہو تم
قفس نصیب روح کی امید آشیاں ہو تم
اجتبیٰ رضوی
…………….
وہی آگ اپنا نصیب تھی کہ تمام عمر جلا کیے
جو لگائی تھی کبھی عشق نے وہی آگ دل میں بھری رہی
الیاس عشقی
……………..
کوثر کا جام اس کو الٰہی نصیب ہو
کوئی شراب میری لحد پر چھڑک گیا
امداد علی بحر
……………
تکیہ اگر نصیب ہو زانوئے یار کا
میں ایسی نیند سوؤں کہ ثابت ہو مر گیا
امداد علی بحر
…………..
کبھی کبھی کوئی بھیجتا ہے نظر میں چاہت کی پھول کلیاں
محبتوں کا نصیب ٹھہرا کبھی کبھی کا اداس رہنا
اسحاق ظفر
………….
نصیب سے کہیں مرنا کسی پہ ہوتا ہے
مزہ جو اس میں ہے وہ عمر جاوداں میں نہیں
جلیل مانک پوری
……….
وہ ہاتھ ان کے چومتی ہے میں ہوں پائمال
یہ ہیں مرے نصیب وہ قسمت حنا کی ہے
جلیل مانک پوری
…………….
سر کو نیزہ نصیب ہوتا ہے
سرفرازی یوں ہی نہیں ملتی
جمال عباس فہمی
…………..
وہ لوگ جو کہ مآل چمن سے واقف ہیں
خزاں نصیب گلوں کی بہار کیا دیکھیں
جوہر زاہری
…………
ہو کبھی تو شراب وصل نصیب
پئے جاؤں میں خون ہی کب تک
جون ایلیا
………….
حسن کو بھی کہاں نصیب جگرؔ
وہ جو اک شے مری نگاہ میں ہے
جگر مراد آبادی
………..
تجھ سے ہم بزم ہوں نصیب کہاں
تو کہاں اور میں غریب کہاں
جوشش عظیم آبادی
………….
سکون وصل میں اتنا نصیب ہو کہ نہ ہو
جس اضطراب سے میں انتظار کرتا ہوں
کرامت علی کرامت
………..
اک زندگی عمل کے لیے بھی نصیب ہو
یہ زندگی تو نیک ارادوں میں کٹ گئی
خلیل قدوائی
………….
تمہارے پاس اک وحشی نے یہ پیغام بھیجا ہے
کہ اب ہجراں نصیبوں کو بھلا دینا ہی اچھا ہے
خلیل الرحمن اعظمی
…………..
نیند آنکھ میں بھری ہے کہاں رات بھر رہے
کس کے نصیب تم نے جگائے کدھر رہے
لالہ مادھو رام جوہر
………..
سب کو محفل میں نصیب ان کے نظارے ہوں گے
ہم کہیں غش میں پڑے ایک کنارے ہوں گے
لالہ مادھو رام جوہر
………….
اسی کے نور سے یہ روشنی بچی ہوئی تھی
مرے نصیب میں جو تیرگی بچی ہوئی تھی
لیاقت جعفری
………..
لکھا وہی تھا کہ جو تھا نصیب کا لکھا
بلا سے خط کا جواب اس نے کچھ دیا تو سہی
قابل دہلوی
…………..
آئیں ہیں وہ مزار پہ گھونگھٹ اتار کے
مجھ سے نصیب اچھے ہے میرے مزار کے
قمر جلالوی
………….
جیت لے جائے کوئی مجھ کو نصیبوں والا
زندگی نے مجھے داؤں پہ لگا رکھا ہے
قتیل شفائی
………..
